Poesias
de Haim Vitali Sadacca*
Memoryas De Un Pesimisto
En la juderiya paso los diyas de mi manseves,
Siento alegriya kuando me akodro kada ves.
Una vida kalma i siempre yena de simplesidad,
Eramos orozos se remarkava en kada edad.***
Todos de vida muy modesta, no mostravan rikezas,
No se viya enemistades,kovdisyos o grandezas,
Ijos, ijas, elnueras biviyamos kon padres i madres,
Todos los vizinos eramos yenos de amistades.***
Respektos i alegriyas reynava en las famiyas,
Sin aver los luksos i las rikezas de estos diyas.
No aviya la ambisyon de oy, eramos umanos,
En los Shabades, en las fiestas todos komo ermanos.***
Si d'alguna ansya era atakado un vizino,
O no puedia alevantarse por ser hazino,
Era kudyado por todos...le davamos una mano,
En amostrandole la kerensya de un ermano.***
Enrikisidos de buenos sentimientos i amor,
Biviamos una vida diferente de este dor.
Agora kuando meldo kada diya las nuvelas,
I veyo todas las desgrasyas...de la vida te yelas.
Rovos,matansinas,las gerras i las salvajeriyas
Te aleshan de tu bivyenta i de tus alegriyas.***
Kero bivir komo antes,sin saver nada de esto
O en borracho inchir mis diyas, o yirme mas presto....
El Deseo i El Testamento De Un Padre
Mi Kerido,
El tiempo ke yo estare mas aedado
I ke me veras la mas parte asentado,
En vezes mal vistido i no arapado
No tengas pena de verme en este estado.
Te rogo mira a entenderme.***
No me kritikes si do valor al dinero ,
Siempre devo pensar al dia vinidero,
La vida es larga, el dinero da koraje,
Esperar ayudos es medya muerte kaje.
Te rogo mira a entenderme.***
Yo asembrare para ke tu rekoltes
Por favor a mis konsejos no te revoltes.
Nunka topes el menester de korijarme,
Kon tus dichas no mires a deskorajarme,
Te rogo mira a entenderme.***
Si en mis aktos estare muy vagaroso,
O si me veras un poko mas angustioso,
En mi kama si esto kaje esveyoso,
Komo si fuera kon mi persona ravyoso,
Te rogo mira a entenderme.***
Rekuerda tu chikes komo me okupava,
En tus primeros pasos ke te kaminava,
Mismo tu komida a la boka te dava,
I siempre a tus yoros remedios topava.
En grande a tus estudios te ayudava,
Para ver tus sonrizas kualo no te dava?
Kon mis bezos i mis kantes te konsolava,
Yo yeno de gozos en los sielos bolava....
Un dia si se trokara mi buen destino,
No me aleshes de tu alma, de tu tino,
Te rogo no te olvides todas mis penas,
Mis dezeos k'esten gravados en tus venas.
En mis dezesperos o ennuvlado dia
Tu sonriza ke seya komo sol ke me bria,
Siempre kero ver el afekto ke yo via,
Deseo ser tu orgulyo, tu alegria....
En mi memorya tengo gravada tu kerensya
Es regalo de mis abuelos komo erensya.***
Kuando un dia vendra la ora de mi ida eterna,
Mi deseo es a ke ames a tu madre komo tu reyna,
I a tu ermano kon los gozos de tus pozitivos pasos
Ke seyash siempre yenos de kerensyas kon bezos i abrasos.
* Haim Vitali Sadacca was born in 1919 in Turkey. After a career in Canada, he now resides in Montreal, Florida and Istanbul. He is the author of Un Ramo de poemas (New York: FASSAC, 2009), and is preparing a second volume of poetry - See more at: http://www.sephardichorizons.org/Volume4/Issue4/Sadacca.html#sthash.zdCXCqPD.dpuf.