La Validja1
De Rivka Abiry2
Ken me puede dizir si observo, en un aeroporto, las validjas ke se entregan a los pasajeros despues ke arivaron a su destinasion. Siempre ay muncha djente alderedor de la banda transportadora ke se arodea todo el tiempo, fina ke el bagaj ampesa a salir del tunel. Las validjas i chantas echos de diversos materieles, vedres, kolorados, mavis o pretos, koriendo, saltan una despues dela otra, o una enriva de la otra kon muncho bruido i a la fin kayen sovre la banda. Mosotros syempre las fiksamos kon moestros oyos, para presto rekonoserlas.
Ay validjas ke son intolerantas, brutalas, i bruskas, aharvan una al la otra o son sin pasensia, son pletesas, fina ke se aresvalan en frente de su proprietario. Otras validjas, las mas grandes, azen este kamino avagariko, yavash, kon dignita, no se deshan ferir, ma amostran su grandura spektakoloza. Todo esto muy enteresante se puede asemijar kon una korrida de otos, i los viajadores apenas viendolas, los apanyan i se fuyen.
Esto era djusto ke me akontesyo kuando una vez vine de Israel. Vide de leshos una validja kolorada, bushkandome, la tomi, la meti sovre el karo, me echi en los brasos de mi ijo ke me estava asperando, la apozimos en el bagaj de su araba i partimos. Arivando a kaza metimos la validja en medio del salon, para avrir i amostrar los regalos ke trusho la nona.
En avriendo la serradura todos mos kedimos kon la boka avierta, kuando vimos ke en la validja aviya solo vestimientas de ombre. Toda la vestimiente kaji mueva, las kamisas dayinda en su empaketaj orijinario, kalsados de lo bueno ke kostaron muncho i muchos pantalones. Todo aresentado por una persona muy pintilik..
En la validja no aviya un adreso afuera o ariento , mesmo la aldikera chika kon el adreso estava arankada. Empesimos a azer bushkadas por telefon, ma
sin reushir i kon el tiempo entendimos ke la sola esperansa era la validja miya ke tenia todos mis detalios . Avria keyido en la mano de una persona inteligente ke iva azer esforso de topar me. ?
Ke rezilik, ke desplazer, ke apreto i en sima de todo esto amanyana Rosh Hashana i yo esto invitada en la Komunitad. Me esto dezmayando. Ke bishmazal……..
Al amaneser, un telefono mos despertyo a todos. Un taksi deviya venir para arekojer la validja i trokarla. Fui muy emosyonada i me se avrieron los oyos, ma no aviya tiempo de eskrivir una letrika de rengrasyemiento, o unas kuantas palavras “te rengrasio”. Apenas me abasto el tiempo de bever mi kafe i de meter en la validja una karta de felisitasiones por Rosh Hashana..
Kon la validja me mandaron una sola roza kolorada, nada mas. No enkontri la persona ke izo el trokido, ma kada anyo resivo una karta de Rosh Hashan, embiyada de diversos paizes del mundo. La roza la seki i djuntos kon las kartas de Rosh Hashana tienen un lugar mahsus en uno de mis dolapes.
Notes:
1 Publikado en Aki Yerushalayim No. 84 (Oktobre 2008). This story was previously published in Aki Yerushalayim No. 84 (Oct. 2008). This version has been edited by Ralph Tarica.
2 Rivka Abiry was born in Marseille in 1920, her mother being from Istanbul (Turkey) and her father from Vidin (Bulgaria). She spent her childhood in Vienna (Austria) and adolescence in Varna (Bulgaria). During the Second World War she moved with her family to Teheran (Iran). After the founding of the State of Israel she went to Israel (Haifa) where she presently lives. Her eldest son Haim fell in the Yom Kippur War, two days after his marriage. She achieved a high school education and a diploma from the Metropolitan College of London. She still works as an English medical secretary and is a computer expert. She is fluent in several languages, including Ladino. Her short stories in this language are being published in Ladino journals all over the world. She writes that her life's resume is like the rainbow’s hues :"Muchas lagrimas i poko sorisos."